2012年8月11日星期六

iPad 裂屏維修


iPad 裂屏維修

上個星期同只貓喺床上玩,一個唔覺意 iPad 就跌咗落地,然後裂痕貫穿整個屏幕。雖然唔影響觸摸(亦都有人話慢慢會影響觸摸反應),但我覺得仲係要修嘅,因為裂痕好影響閱讀。
上 Twitter 問大家 iPad 裂屏可以點修,原嚟 Apple 官方修要兩千幾,買所謂嘅「原裝屏幕」就只要幾百。我嘅係 64GB Wi-Fi 版,兩千幾修一下仲可以接受。後嚟上 Apple 官網確認,裂屏屬於 Out-of-Warranty 維修,第三代 iPad 無論型號一律收 $300,所以越貴嘅型號維修費用比例越低。
我去香港修或者去北京修都得,只不過香港 Genius Bar 隨約隨有,北京就因為黃牛黨搗亂而經常約滿,所以比較難約。此外,$300 喺香港交就唔使稅,喺北京交就要加 17% 增值稅,所以我最後選擇去香港修。
星期一我一早出門口去搭直通車,發現即刻走嗰班已經冇票,而下一班亦都冇曬一等票。等我排隊排到窗口嘅時候,下一班就淨翻一張特等票啦,咁我梗係要啦,因為再下一班就要中午先開出咯。我去到紅磡就速速西鐵轉地鐵過香港,然後上 IFC Mall 揾 Apple Store。
香港 Apple Store 嘅服務好似係比北京好啲。我 1:20 入去話有 1:30 嘅 appointment,即刻就有人話「咁我宜家幫你睇睇係咩問題啦」。佢好 nice 咁話我知裂屏要 charge HK$ 2368,我都預咗㗎啦,所以就話冇問題,叫佢先確認下係唔係即刻有得換。之後佢去倉庫幫我攞 replacement unit,裨我睇過開機 check 過冇問題之後再碌卡。
所謂 replacement unit,外面睇落去係全新嘅,入邊係點就唔知啦。搞掂之後同個 friend 出去食咗個唔知仲算唔算 lunch 嘅 lunch,之後佢去上班我搭直通車返歸。

2 則留言:

  1. 冰与火9:07 下午

    似乎您的这个粤语博客更多是扯家常啊。。看得我好生不懂。。为什么Chinese博客里不同步这个呢?

    回覆刪除
  2. 因為用粵語寫長文章比較麻煩。

    回覆刪除