今日行過公司 IT 附近嘅 hardware vending machine，碌卡攞咗副 Apple EarPods，然後將我手上嘅 Apple Earphones 放低。用 iPhone 聽咗下，覺得區別唔大，就係清晰咗啲，同埋冇咁易甩出嚟。線控大咗，不過用下就慣。最好嘅一點係終於有捆線盒，啲線再都唔會亂繞。
2012年10月13日星期六
Apple EarPods
今日行過公司 IT 附近嘅 hardware vending machine，碌卡攞咗副 Apple EarPods，然後將我手上嘅 Apple Earphones 放低。用 iPhone 聽咗下，覺得區別唔大，就係清晰咗啲，同埋冇咁易甩出嚟。線控大咗，不過用下就慣。最好嘅一點係終於有捆線盒，啲線再都唔會亂繞。
2012年9月29日星期六
香港機場貴价餐
經香港中轉去三番市，中午喺機場食，HK$ 98 一個班魚球套餐。碗粥上嚟嘅時候睇落去咩都冇，翻一翻發現仲係有班魚有瑤柱嘅。
香港機場乜都好，就係有得充電。我部 iPhone 4S 被我用嚟上網上到冇曬電，都只可以用 MacBook Air 嚟幫佢充。
2012年8月11日星期六
iPad 裂屏維修
上個星期同只貓喺床上玩，一個唔覺意 iPad 就跌咗落地，然後裂痕貫穿整個屏幕。雖然唔影響觸摸（亦都有人話慢慢會影響觸摸反應），但我覺得仲係要修嘅，因為裂痕好影響閱讀。
上 Twitter 問大家 iPad 裂屏可以點修，原嚟 Apple 官方修要兩千幾，買所謂嘅「原裝屏幕」就只要幾百。我嘅係 64GB Wi-Fi 版，兩千幾修一下仲可以接受。後嚟上 Apple 官網確認，裂屏屬於 Out-of-Warranty 維修，第三代 iPad 無論型號一律收 $300，所以越貴嘅型號維修費用比例越低。
我去香港修或者去北京修都得，只不過香港 Genius Bar 隨約隨有，北京就因為黃牛黨搗亂而經常約滿，所以比較難約。此外，$300 喺香港交就唔使稅，喺北京交就要加 17% 增值稅，所以我最後選擇去香港修。
星期一我一早出門口去搭直通車，發現即刻走嗰班已經冇票，而下一班亦都冇曬一等票。等我排隊排到窗口嘅時候，下一班就淨翻一張特等票啦，咁我梗係要啦，因為再下一班就要中午先開出咯。我去到紅磡就速速西鐵轉地鐵過香港，然後上 IFC Mall 揾 Apple Store。
香港 Apple Store 嘅服務好似係比北京好啲。我 1:20 入去話有 1:30 嘅 appointment，即刻就有人話「咁我宜家幫你睇睇係咩問題啦」。佢好 nice 咁話我知裂屏要 charge HK$ 2368，我都預咗㗎啦，所以就話冇問題，叫佢先確認下係唔係即刻有得換。之後佢去倉庫幫我攞 replacement unit，裨我睇過開機 check 過冇問題之後再碌卡。
所謂 replacement unit，外面睇落去係全新嘅，入邊係點就唔知啦。搞掂之後同個 friend 出去食咗個唔知仲算唔算 lunch 嘅 lunch，之後佢去上班我搭直通車返歸。
2012年5月15日星期二
我返到廣州啦！
之後廣州有咩活動，大家可以叫埋我，不過記得我星期六都要上班就係啦。我一個月至少要返北京一次，所以北京嘅聚會仲可以偶爾參加下。如果有人要幫手帶嘢，亦都可以揾我。
P.S. 如果珠三角有人對豌豆莢嘅任何職位感興趣，都可以揾我。
2012年2月26日星期日
豐盛嘅晚餐
今日下午去望京同人傾嘢，好快搞掂之後返屋企又唔係好，唔返又唔知做乜好，於是決定順路去 IKEA 睇睇。結果發現今日係 IKEA 冬季促銷最後一日，人多到爆，門口等的士排長隊。我即刻決定唔買大件嘢，拾啲三文魚就走。
返到屋企想煲湯但係冇肉，懶得落街買所以用章魚煲菜乾。因為最近呢兩日突然間掛住臘腸香，所以就做咗個臘味飯。加埋三文魚，一個人三個送。估計我食唔曬，唔知點算好，只有湯可以留低分裨其他人。
P.S. 唔知點解，當我烤三文魚嘅時候就會想嚟呢度寫嘢。
訂閱：
文章 (Atom)